တို့များ ပုခန်း
-------------
(ပခန်းကြီးမြို့ဟောင်း)
"လေးရာပြုဆန်း၊ မြို့ကူးခန်း၊ ပခန်း ခေါ်သထွေ"
"ကဝိလက္ခဏာသတ်ပုံကျမ်း"
သစ်ပင်ချူံနွယ်များအကြားတွင် မြင့်မြင့်မားမား
မြို့ရိုးပျက်ကြီးများသည်အေးဆေးတည်ငြိမ်စွာဖြင့် အတိတ်သမိုင်းကိုပြောနေကြဟန်ရှိသည်။တချိန်
က ကူးခန်းဟု တွင်ခဲ့သော ပခန်းမြို့ဟောင်းဖြစ်
သည်။ ချင်းတွင်းမြစ်၏ လက်ယာဘက်ကမ်း ရေစကြိုနှင့် ၁၀မိုင်အကွာ ပခုက္ကူနှင့်မိုင်၂၀အ
ကွာ ကားလမ်းမကြီးပေါ်တွင်ရှိသည်။
ရှင်မတောင်၏အရိပ်အောက်တွင် ရှားပင်များ၊
ထနောင်းပင်များ၊ထန်းညိုပင်များဖြင့်ဝန်းရံထားသော အေးချမ်းသာယာသည့် အညာရွာကြီးတစ်ခု
အဖြစ်သို့ ရောက်နေပြီ။
တချိန်တခါကဆိုလျှင်
"သည်တွင်ရွှေမြို့၊ သည်သို့စေတီ၊ သည်ဆီရွှေနန်း" ဟု စိတ်ကမှန်း
၍ ကြည်နူးစရာမြို့ကြီးဖြစ်ခဲ့သည်။ဘုရားအို
ကျောင်းပျက်တို့လည်း ပေါများလှပါဘိ။
ဗုဒ္ဓသာသနာထွန်းလင်းပွင့်လန်းခဲ့ရာနေရာလဲ
ဖြစ်ခဲ့သည်။
မြန်မာဘုရင်များလက်ထက်တော်ကိုပုခန်းတိုက်သည်ထင်ရှားခဲ့သော ဒေသဖြစ်သည်။ ပခန်းသည် သာသနာသက္ကရာဇ် ၃၆ခုနှစ်ဓနုသီဟမင်းလက်ထက်တွင် စ၍ မြို့တည်ထောင်စိုးစံခဲ့သည်ဟု နရဒီပကျမ်းတွင် ပြဆိုခဲ့သည့်အတိုင်း ရှေးသမိုင်းရှိသည်။
ပုဂံခေတ် သိန်းခိုမင်းလက်ထက် သက္ကရာဇ်၂၇၇
တွင် မင်းစည်သူနှင့် မင်းကျော်စွာညီနောင်မင်း
သားနှစ်ပါးသည် ဤအရပ်သို့ရောက်လာပြီး
တောင်သုံးလုံးမြေကိုညိုကာ မြို့တည်သဖြင့်
"ကုခန္ဓ"(တူးခြင်း၊ညိုခြင်း)အနက်ကိုယူကာ
"ကူးခန်း"ဟု သမုတ်ခဲ့ကြသည်။ နရပတိစည်သူ
မင်းကြီးလက်ထက်(သက္ကရာဇ်၅၃၆)တွင် ကူးခန်း
အရပ်မှ သူပုန်သူကန်ထကြွ၍လာရောက်တိုက်
ခိုက်နှိမ်နှင်းရာ "သူပုန်များ ပစေ၊ ခန်းစေ"
ဟူသော ရည်ရွယ်ချက်ဖြင့် "ပခန်း"ဟုသမုတ်ခဲ့
ကြောင်းလဲတွေ့ရသည်။ဟံသာဝတီပါမင်းလက်
ထက် ကူးခန်းကို မြို့ရိုးများနိမ့်ချည်မြင့်ချည်
အကွက်ကျစနစ်တကျဆောက်လုပ်၍ မြို့တော်
ကိုပြုပြင်ခဲ့သဖြင့် "ပခန္ဓ" သဒ္ဒါအရ ပခန်းဟုတွင်
ခဲ့ကြောင်းလည်းဆိုကြသည်။အချိန်ကာလကြာ
ရှည်လာသောအခါ ပခန်းကြီးမှ "ပုခန်းကြီး"ဟု
အမည်တွင်လာခဲ့သည်။
ပခန်းသည်မြန်မာ့သမိုင်းစဉ်တလျှောက် သူ့ဂုဏ်
သူ့သိန် သူ့အရှိန်နှင့် ထင်ရှားခဲ့သောဒေသတခု
ဖြစ်သည်။မြန်မာမှုရေးပီတိများဖြင့်လဲ လွှမ်းခြုံခဲ့ရ
ပါသည်။ ပခန်းတွင် အထင်ရှားဆုံးမှာ စည်သူရှင်
ဘုရားဖြစ်၏။ပခန်းမြို့အလယ်ကုန်းတော်ပေါ်တွင်
မင်းစည်သူတည်ထားခဲ့သည်။
နောင် မင်းအဆက်ဆက်ကလဲပြုပြင်ခဲ့ကြ၏။
စည်သူရှင်၏ခြေတော်ရင်းမှ အနောက်မြောက်
ယွန်းယွန်းတနေရာတွင် ပခန်းကျောင်းတော်ကြီး
ရှိ၏။
သုံးဆင့်လည်ပေါ် မိုးပြသာဒ်၊ဘုရားဆောင်
တစ်ဆောင်၊ဘောဂဆောင်၊ ကျက်သရေခန်း
ဆောင် စင်္ကြံလမ်းတို့နှင့် အခန်းခန်းအသွယ်
သွယ် ပန်းနွယ်ပန်းဆိုင်း၊ နရားဆိုင်း နရားကြွ
စာမရီပန်းအလှတွေနှင့်မြိုင်နေသည်။ထီးကိုင် သန်လျက်ကိုင်၊ သားမြီးယပ်ကိုင်၊နတ်ရုပ်၊ဘီလူး
ရုပ်တို့ကလဲ တံခါးရွက်တိုင်းမှာစောင့်ကြပ်နေကြ
သည်။ ကျောင်းဒကာကား ကျီဝန်မင်းကြီးဦးတုတ်
ဖြစ်သည်။
ပခန်းမြို့ဟောင်းကြီး၏အရှေ့မြောက်ယွန်းယွန်း
ချင်းတွင်းမြစ်ကမ်းနံဘေးရှိ ပခန်းငယ်က ကျောင်းဒကာ ပခန်းမင်းကြီးဦးရန်ဝေး၏ကျောင်း
ကြီးမှာလည်း လူတဖက်ခန့်ကျွန်းတိုင်ကြီးများနှင့်
ခန်းနားပါဘိ။ထည်ဝါလှပါ၏။ပုခန်း၏မြို့တွင်း၊မြို့
ပြင်အနှံ့ အင်္ဂတေအမည်းအကွာ၊ အုတ်ရိုးလွှာ
ကြေးညိုရောင်နှင့် ဘုရားအိုဘုရားပျက်များကလဲ
ပေါများလှဘိသည်။ရေတွက်၍ပင် ကုန်နိုင်စရာ
မရှိ။
ပုခန်းသမိုင်းကိုလေ့လာရင်း ပုခန်းမြို့ဟောင်း
မြင်ကွင်းကိုမြင်ရမှ ပုခန်း အတိတ်သမိုင်းသည်
လွမ်းစရာဖြစ်လာသည်။
ပုဂံခေတ်က မင်းစည်သူ၊ မင်းကျော်စွာတို့သည်
ခမည်းတော်ပုဂံဘုရင်၏အလိုကျ မြို့ပြပြည်ရွာ
စည်ကားအောင်တည်ခဲ့ကြသည်။မြောင်းအ
သွယ်သွယ်တူး၍ ချင်းတွင်းမြစ်ရေကိုယူကာ
စပါးတွေစိုက်ခဲ့ကြသည်။သူခိုးဓါးပြရန်ကိုလည်း
ကာကွယ်ခဲ့ကြသည်။ပြည်သူကိုစည်းရုံးခဲ့ကြသည်။ထိုဒေသသားတို့သည် မည်မျှချစ်ကြ
သနည်းဆိုသော် နောင်အခါ မင်းကျော်စွာအား
ဦးမင်းကျော်၊ ကိုကြီးကျော် နတ်အဖြစ်နှင့် ယနေ့
တိုင် ကိုးကွယ်နေကြဆဲဖြစ်သည်။့
ပုဂံအနော်ရထာလက်ထက်က ပခန်းသည်
လေးရာပြုမြို့ဖြစ်၏။ စစ်မက်ရေးရာရှိလျှင်
စစ်သည်အမှုထမ်း လေးရာ ပေးရသည်။
အနော်ရထာမင်း၏ ပုဂံစစ်သည်တို့သည် ဂျွမ်း
သူပုန်စစ်သည်တို့ကို တိုက်ရာနှင့် တိုင်းတစ်ပါး
ရန်သူများကိုတိုက်ခိုက်ရာတွင် နတ်စစ်သည်များ
ကဲ့သို့ ရဲရင့်ပြီးကျွမ်းကျင်ဖျတ်လတ်၏ဟု သမိုင်း
ဆရာတို့က မှတ်တမ်းတင်ခဲ့ကြသည်။
ထိုသို့ဆိုလျှင် ပုခန်းသားတို့သည်လည်း နတ်စစ်
သည်များကဲ့သို့ရဲရင့်သည်၊ သတ္တိရှိသည်ဟု ဆိုရပါမည်။
ပုခန်းမြို့ဟောင်း၏မြောက်ဘက်မနီးမဝေးတွင်
ရွှေဥမင်တောရရှိသည်။ဒုတိယအင်းဝခေတ်တွင်
တစ်ပါးတည်း အရညဝါသီ တောအရပ်မှီ၍
ဂူအတွင်း ချူံအတွင်းမှ ပေရွက်၊ထန်းရွက်၊သစ်
ရွက်တို့ဖြင့်စာပေရေးသားကျမ်းပြုခဲ့သော အံ့ဖွယ်
စာရေးဆရာဖြစ်သည်။ပညာပြည့်ဝနှလုံးလှတော်
်မူပါပေ၏။နေပြည်တော်မှကြွလာသော မင်းဆရာ
တောင်ဖီလာဆရာတော်က တောထဲမှာ တစ်ပါးတည်း မကြောက်ဖူးလားဟု မေးရာ
ရွှေဥမင်ဆရာတော် ရှင်ဇမ္ဗူဒီပဓဇက ကြောက်၍
တစ်ပါးထဲနေပါတယ်ဘုရားဟု တရားနှင့်ဆုံးမ
လိုက်ရာ တောင်ဖီလာဆရာတော် တရားကျ၍
တောရမှီးခဲ့သည်ဟုရှေးဆရာတို့ ရေးခဲ့ကြဖူး
သည်။
မြန်မာ့ အနှသဘင်သမိုင်းတွင် ပခန်းသဘင်
ပညာရှင်တို့ ထင်ရှားခဲ့ကြသည်။ မင်းသားကြီး
ဆရာညို၊ မင်းသားကြီး ဦးအောင်သာ၊ မင်းသမီး
မညိုသ၊ မင်းသမီး မစိန်အိုတို့မှာ အမှတ်တရ
လွမ်းစရာဖြစ်၏။ ပုခန်းဆရာညို ဆိုလျှင် အညာတစ်ခွင်မှာနာမည်ကြီးခဲ့၏။ အဆိုကောင်းအငိုကောင်း မင်းသားဖြစ်သည်။
ပွဲပြန်ခါနီး နူတ်ခွမ်းဆက်ရပြီဆိုလျင် ဆရာညိုက
"ကညာပျို၊ ဘာကိုမှ မလွမ်းရစ်ပါနဲ့
ဆရာညို ဖာကိုထမ်းပါလို့
နာဂရာမြို့ပခန်းကိုတဲ့ ပြန်တော့မယ်"
ဟုဆိုလေ့ရှိသည်။ထိုခေတ်က ပွဲကြိုက်ခင်တို့မှာ
လွမ်းမျက်ရည်မဆည်နိုင်အောင်ရှိသည်ဟု
ရှေးလူကြီးသူမများ ပြောကြသည်။
ပုခန်းနယ်က အဘိုးအဘွားတို့က သူတို့
အရပ်ကိုရောက်လျှင်ပြောလေ့ရှိကြသည်။
" တို့များပုခန်းက ရှားပင်ပေါ် ဂုံနွယ်ရစ်ပေါက်တဲ့
အရပ်မို့ ရှားပါးပေမယ့် ဂုဏ်ရှိသတဲ့ကွဲ့"
ပခန်းနယ်မှာ ရဟန်းပညာရှိ လူပညာရှိတွေ
သမိုင်းအဆက်ဆက် ပေါ်ထွက်ခဲ့ကြသည်။
သာသနာဝင်ကျမ်းများ၊ ရာဇဝင်ကျမ်းများနှင့် ဒေသဆိုင်ရာမှတ်တမ်းများအရရှာဖွေတွေရှိရသည်။ ပုခန်းနယ်သည် ကျယ်ဝန်းလှ၏။
အသေးစိတ်သုတေသနပြု၍ ဆက်လက်ရှာဖွေပါ
လျှင် ပခန်းနယ်မှ သာသနာပိုင်များ၊ စာပြုစာဆို
ပုဂ္ဂိုလ်ကျော်များ။ မှူးကြီး မတ်ကြီးများ။ အာဇာနည်သူရဲကောင်းများ အနှသဘင်ပညာရှင်
များ၏ အကြောင်းသည် စာတစ်စောင် ပေတစ်ဖွဲ့
ဖြစ်လာပေလိမ့်မည်။
ရှေးအခေါ်ပခန်းနယ်သည် ယခုအခါ ရေစကြို
မြို့နယ်၊ မြိုင်မြို့နယ်၊ ပခုက္ကူမြို့နယ်တို့ ပါဝင်မည်
ဖြစ်သည်။ထိုဒေသများအတွင်း လေ့လာစရာ
မြန်မာမှုတွေများစွာရှိသည်။မှတ်သားစရာ
သမ်ိုင်းဖြစ်ရပ်တွေများစွာရှိသည်။
ပုခန်းနယ်အတွင်းသို့ ခရီးလှည့်ရလျှင် ကျောက်စရစ်ကုန်း ခင်တန်း တောတန်း မြေနီလမ်းတခို၌ ပိတောက်ပန်းတို့မွှေး၏ ။
ဒဟတ်ပန်းတို့လှ၏။ သရဖီက လှိုင်၏။ ထန်းပွင့်
ထန်းခိုင်က သင်း၏။ ရှားပင် ထနောင်းပင်
တစောင်းပင် တမာပင် သရက်ပင်တို့နှင့် တန်ဆာဆင်သော ပခန်းသည် ရိုးသားပါ၏။
လှပါ၏။ သမိုင်းအစဉ်အလာ ကြီးမားပါဘိ။
ကျမ်းကိုးစာရင်း
-----------------
၁။ဗန့်ကျီကိုလှမ်းပါလို့ ပခန်းကိုဝင်ခဲ့တယ်-
စာပေဗိမာန်စာမူဆုရ တင်မြင့်
၂။မြန်မာစာပေသမိုင်း ဦးဖေမောင်တင်
၃။နန်းဓလေ့မှတ်တမ်း မြကေတု
၎။မြန်မာရာဇဝင် ဦးဘသန်း
၅။ခရီးသွားစာပေမှတ်တမ်းများ စာပေဗိမာန်
၆။မြန်မာမှု ဦးတင်လှ
၇။ပခန်းအကြောင်းသိကောင်းစရာ ပခန်းကျော်
်
Credit; ရေစကြိုသတင်းမီဒီယာ FB
No comments:
Post a Comment